കരഞ്ഞു കരഞ്ഞങ്ങിനെ
കറുത്ത പൂച്ച
അടുപ്പിന്‍ തിണ്ണയില്‍ നാലു പെറ്റു..
കറുത്ത പൂച്ചയ്ക്ക്‌
വെളുത്ത നാലു മക്കള്‍..
ഒന്നിനു കണ്ണില്ല.
ഒന്നിനു കാതില്ല.
ഒന്നിനു നാവില്ല.
ഇനിയൊന്നിന്‌
ഇതു മൂന്നുമില്ല.
എരിഞ്ഞു കരിഞ്ഞ കനല്‍ചൂടില്‍
തിരിച്ചൂം മറിച്ചുമിട്ട്‌
കറുത്ത പൂച്ച
വെളുത്ത കുഞ്ഞുങ്ങളെ
തണുപ്പകറ്റി പോറ്റി.
വളര്‍ന്നു വളര്‍ന്നൊരിക്കല്‍
കണ്ണില്ലാത്ത പൂച്ച
വഴിയറിയാതെ എങ്ങോ പോയി..
കാതില്ലാത്ത പൂച്ച
ശെരിയോ തെറ്റോ കേള്‍ക്കാതെ
നടന്നകന്നു..
നാവില്ലാത്ത പൂച്ച
ഒരക്ഷരമുരിയാടാതെ
ഒളിച്ചോടിപ്പോയി..
കണ്ണും കാതും നാവുമില്ലാത്ത നാലാമനാകട്ടെ,
കരിഞ്ഞ കനലുകള്‍
എരിഞ്ഞു കത്തിയത്‌ കാണാതെ
അടുപ്പില്‍ വീണ്‌ ചത്തുപോയി..
കറുത്ത പൂച്ച
കരഞ്ഞു പറഞ്ഞത്‌
അവന്‍ കേട്ടില്ല..
അവന്‍ കരയാന്‍ ശ്രമിച്ചത്‌
ആരും അറിഞ്ഞു പോലുമില്ല..
കനല്‍ എരിഞ്ഞൊടുങ്ങിയപ്പോള്‍..
കരഞ്ഞു കരഞ്ഞങ്ങിനിരുന്ന കറുത്ത പൂച്ച
അടുപ്പിന്‍ തിണ്ണയില്‍ വീണ്ടും നാലു പെറ്റു....
No comments:
Post a Comment