ഇടമുറിയാതെ
ചെരിഞ്ഞുപെയ്ത മഴയില്‍
എന്‍റെ ഒരു കണ്ണ്‌ ഒലിച്ചുപോയി..
ഞാന്‍ അമ്മയെ ആദ്യം കണ്ടത്‌
ആ കണ്ണ്‌ കൊണ്ടായിരുന്നു.
എരിഞ്ഞു കത്തി
കുത്തനെ വീണ വെയിലില്‍
എന്‍റെ നാവിന്‍റ്റെ ഒരു പകുതി
പൊള്ളി അടര്‍ന്നു വീണു കരിഞ്ഞു പോയി..
ഞാന്‍ "അച്ഛാ" എന്നാദ്യം വിളിച്ചത്‌
ആ നാവു കൊണ്ടായിരുന്നു..
അലറിപ്പാഞ്ഞ്‌
വിലങ്ങനെ വീശി അടിച്ച കാറ്റില്‍
എന്‍റെ ഒരു കൈ പറിഞ്ഞു തെറിച്ചു പോയി..
ഞാന്‍ അനിയത്തിയെ പിച്ചവപ്പിച്ചു നടത്തിയത്‌
ആ കൈ കൊണ്ടായിരുന്നു...
നിശബ്ദമായി
സൂചിക്കുത്തു പോലെ
മുകളിലേക്കു പടര്‍ന്നു കയറിയ കൊടും ശൈത്യത്തില്‍
എന്‍റെ ഒരു കാല്‍
മരവിച്ചു കോടി അടര്‍ന്നു പോയി..
ഞാന്‍ അനുജനെ ചുമലില്‍ താങ്ങി നടന്നത്‌
ആ കാലു കൊണ്ടായിരുന്നു..
ഋതുഭേദങ്ങള്‍ക്കിപ്പുറം
ഒടുവില്‍
ഞാനിന്ന്‌
തീര്‍ത്തും അനാഥനാണ്‌..
No comments:
Post a Comment